Mërgim Vojvoda ka thënë se për kualifikim në ngjarje të mëdha nuk mjafton vetëm paraqitja në fushë. Ai ka thënë se të gjithë duhet të marrin më shumë përgjegjësi.
“Nuk është që Bjellorusia ka pasur shumë raste, që e ka pasur lojën në kontroll. Ne kishim shumë raste, por nuk shënuam golin që do të na jepte vetëbesim. E morëm golin nga gjysmërasti, por ky është futbolli, duhet të pajtohemi”, ka thënë Vojvoda.
Ai më pas ka folur për gjithë ciklin kualifikues.
“E kemi dhënë maksimumin, por kemi pasur edhe shumë mungesa fatkeqësisht. Lojtarët e ri duhet t’i falënderojmë shumë. Është një përvojë e madhe për ta për të ardhmen. E lëshuam edhe një rast për kualifikim, por nuk ishte lehtë. Kemi lojtarë fantastikë. Ambienti është i mirë, i kemi inkuadruar lojtarët e rinj shumë mirë. Unë mund të flas për fushë dhe për kohën kur jemi bashkë. Ne kalojmë shumë mirë. Për kualifikim nuk është vetëm fusha, ka shumë gjëra. Shumë persona, shumë staf. Duhet të marrim përgjegjësinë. Unë kur vijë e jap maksimumin. Duhet të marrim përgjegjësi më të mëdha”, ka theksuar Vojvoda.
Ai foli edhe për gjendjen e rëndë të fushës në “Fadil Vokrri”.
“Sot u kanë shumë zor. Do të kishim pasur qejf të kemi një stadium më të mirë. Nuk e di kush e ka këtë përgjegjësi. Unë vij për të luajtur. Shpresoj se do të kemi kushte më të mira”.