Granit Xhaka insiston se Arsenali nuk do të dorëzohet deri në fund për titullin e kampionit të Anglisë, ndërsa shtoi se suksesin e kërkon edhe në Kupën FA. Arsenali të martën mbrëma barazoi pa gola në shtëpi ndaj Newcastle Unitedit. Pikën e fituar në këtë ndeshje, Xhaka e ka vlerësuar si tejet të rëndësishme. Ai ka thënë se falë kësaj pike, Arsenali mund të shpallet kampion në fund të sezonit. Ekipi nga Londra është lider në Premier League dhe po e kërkon titullin e parë që nga viti 2004. Ka tubuar 44 pikë, tetë më shumë se përcjellësi më i afërt, Manchester City.
Për Arsenalin, ky ishte vetëm barazimi i dytë këtë edicion në kampionat.
“Normalisht, që je i zhgënjyer kur nuk fiton, por mund të ndihemi krenar me paraqitjen tonë. Kishim raste për ta fituar ndeshjen, por tani duhet të vazhdojmë përpara dhe të fokusohemi për duelin e radhës”, ka thënë Xhaka.
Mesfushori 30-vjeçar shtoi se Arsenali është në pozitë të mirë, por nuk duhet ta humbë fokusin në asnjë mënyrë. Ai pret ndeshje të vështira deri në fund të këtij edicioni dhe shton se të gjithë në klub janë të përgatitur për këtë sfidë. Duelin e radhës në kampionat, Arsenali e luan vikendin tjetër në udhëtim te Tottenhami.
“E kemi parasysh se njerëzit presin që t’i fitojmë të gjitha ndeshjet, por ky është futboll dhe ndonjëherë gjërat vështirësohen. Mund të ndodhë që gjatë ndeshjes të mos keni fat, siç ndodhi me Newcastlen që e mori një pikë me meritë”, është shprehur Xhaka. “Ne e marrim një pikë, e cila në të vërtetë mund të jetë shumë e rëndësishme në fund të sezonit. Është mirë ta mbajmë këtë ritëm”.
Krahas titullit, Xhaka shtoi se Arsenali kërkon suksesin edhe në FA Cup. Ndeshjen e parë të këtij sezoni në këtë garë, Arsenali e luan të hënën e ardhshme. Përballet në udhëtim me Oxford Unitedin në kuadër të raundit të tretë. Në fakt, Arsenali sezonin e shkuar u eliminua në këtë rund pasi u mposht nga Nottingham Foresti. Sa i përket Kupës FA, Arsenali është ekipi më i suksesshëm i Anglisë pasi këtë garë e ka fituar plotë 14 herë. Herën e fundit, Arsenali triumfoi në sezonin 2019/20.
“Sigurisht, që duam të jemi suksesshëm edhe në Kupën FA. Kjo garë është shumë e rëndësishme për ne dhe ne duam të avancojmë përpara duke startuar prej ndeshjes që na pret të hënën. Sezonin e shkuar në humbëm në ndeshjen e parë dhe këtë herë nuk do të lejojmë këtë”, insistoi Xhaka.
Xhaka ka 17 paraqitje në Premier League deri më tani, ku ka shënuar tre gola dhe ka asistuar katër herë. Ai është pjesë e Arsenalit prej vitit 2016 dhe njëri prej lojtarëve më të rëndësishëm këtë sezon.