Granit Xhaka nuk lë hapësira për dyshime. Është ai që do të komandojë në mesfushën e Bayer Leverkusenit. Për këtë arsye Leverkuseni vendosi që ta blinte për 25 milionë euro.
Dhe shenja e parë është se Xhaka është kthyer në stërvitje katër ditë më herët se që është pritur. Ka nisur përgatitjet me skuadrën të enjten dhe të premten ka folur për transferimin e tij, trajnerin Xabi Alonso, si dhe ka treguar se ish-skuadra, Moenchengladbachu nuk e kishte në plane për ta transferuar.
“Vetëm doja të shkoja te Leverkuseni. Kam pasur biseda të mira me Simon Rolfesin, drejtorin sportiv të klubit, dhe po ashtu me trajnerin Xabi Alonso. Më pëlqejnë sfidat e reja”, ka thënë të premten Xhaka, shkruan gazeta gjermane “Bild”.
Alonso me çdo kusht e donte rikthimin e Xhakës në Bundesligë. Trajneri i Leverkusenit i ka dhënë kapitenit të Zvicrës rolin e udhëheqësit. Ai kërkon nga Xhaka që të jetë udhëheqës i skuadrës së re në moshë. Kërkon që të sjellë më shumë agresivitet te skuadra që për synim tani e ka Ligën e Kampionëve.
Ka qenë një përshtatje e menjëhershme mes dy yjeve.
“E njihnim njëri-tjetrin edhe më parë, si kundërshtarë. Ai ishte te Bayerni, unë te Moenchengladbachu. Ai ishte 32-vjeçar, unë isha 22-vjeçar. Kjo ka qenë tema e parë që e kemi biseduar”, ka thënë Xhaka.
“Më pëlqen ideja e tij dhe filozofia e lojës. Pasi kemi folur për herën e parë, nisa t’i shikoja shumë ndeshje të Leverkusenit. Më pëlqente mënyra e lojës dhe si ai dëshironte që ekipi të luante. Më pas ka qenë vendim i shpejtë”, është shprehur Xhaka.
Xhaka e pranon se vendimi ka qenë i lehtë për t’iu bashkuar skuadrës që drejtohej nga Alonso. E vlerëson shumë teknikun spanjoll.
“Trajneri është model për secilin lojtar të ri dhe është personalitet i madh. Për mua ishte shumë e veçantë kur më thirri në telefon. Jam shumë i lumtur që jam pjesë e ekipit të tij”, ka thënë 30-vjeçari.
Spekulimet për kthimin e Xhakës te skuadra e Moenchengladbachut, nuk kanë qenë kurrë temë serioze.
Xhaka te Gladbachu ka luajtur nga viti 2012 deri në vitin 2016. Prej atëherë ishte tek Arsenali.
“Ende kam kontakte me zyrtarë të skuadrës së Gladbachut, por nuk ka qenë asnjëherë çështje rikthimi. Nuk jam kontaktuar nga klubi në shtatë vjetët e kaluar në Londër. Por, i kam kaluar katër vjet të jashtëzakonshëm në Gladbach”, deklaroi Xhaka, të cilit politika aktuale e Gladbachut nuk i pëlqen.
Shumë lojtarë nga kjo skuadër po largohen si futbollistë të lirë, përfshirë edhe Marcus Thuram dhe Lars Stindl.
“Gladbachu nuk është njohur për lirimin e lojtarëve si futbollistë të lirë. Është turp për klubin. Kjo skuadër është shumë e afërt për mua. Por, kjo nuk është puna ime”, deklaroi Xhaka, i cili nga Gladbachu për tek Arsenali ishte transferuar për 45 milionë euro.