Arsenali u eliminua të enjten nga Sportingu në 1/8 e finales në Ligën e Evropës kur zhvilloi 120 minuta dhe ekzekutoi penalltitë. Megjithatë, lodhja e madhe dhe eliminimi i hidhur për “revolveristët” nuk ndikoi në elitën e futbollit anglez të dielën.
Arsenali e fitoi ndeshjen e xhiros së 28-të në Premier League në shtëpi kundër Crystal Palacet, 4:1. Ishte fitorja e gjashtë rresht në ligë për Arsenalin, ndërsa kontribut dha edhe Granit Xhaka, që shënoi njërin prej golave. Gabriel Martinelli dhe Bukayo Saka shënuan në pjesën e parë në minutën e 28-të dhe të 43-të Xhaka shënoi në minutën e 55-të të ndeshjes me asistimin e Leandro Trossardit.
Ishte goli i katërt në Premier League këtë sezon, ndërsa ka edhe pesë asistime. Për 3:1 realizoi Jeffrey Schlupp i mysafirëve, ndërsa Saka në minutën e 74-t vulosi rezultatin final të takimit. Xhaka e kompletoi këtë ballafaqim.
Arsenali në 28 ndeshje të luajtura është i pari në tabelë me 69 pikë. Ka tetë pikë më shumë se Manchester City, që ka një ndeshje më pak të luajtur. Crystal Palace në mesin e tabelës ka 28 pikë.