Një ditë pasi u prezantua te skuadra nga Ukraina, Metalist 1925, sulmuesi i krahut, Baton Zabërgja ka marrë ftesë nga Kombëtarja e Kosovës për ndeshjet e shtatorit.
Klubi ukrainas, të mërkurën e ka konfirmuar ftesën për Zabërgjën, në të cilin llogarit selektori i Kosovës, Franco Foda.
“Lojtari i ri i Metalist 1925, Baton Zabërgja, është thirrur në ekipin kombëtar të Kosovës për ndeshjet kualifikuese të Botërorit 2026 që luhen në shtator”, ka njoftuar Metalisti në faqen e tij zyrtare.
Kosova në fillim të shtatorit, do ti luajë dy ndeshje në kuadër të Grupit B kualifikues për Kupën e Botës 2026.
Më 5 shtator, Kosova në Basel do të përballet me Zvicrën kurse më 8 shtator e pret Suedinë në stadiumin “Fadil Vokrri”.
Zabërgja ka vetëm një paraqitje me Kosovën, ndërsa të martën është zyrtarizuar te Metalisti i Ukrainës, ekip të cilit iu bashkua nga Dinamo City i Shqipërisë.
24-vjeçari me ekipin nga Ukraina ka firmosur kontratë trevjeçare me opsionin e rinovimit edhe për vitin e katërt.