Sulmuesi i krahut, Nicolo Zaniolo, është i gatshëm të rikthehet në Serie A, por vetëm te skuadra e Juventusit. Futbollisti i Galatasarayt në një intervistë të enjten ka pranuar se dëshira e tij është që t’i bashkohet Juventusit.
Ditë më parë është raportuar se Juventusi është në negociata me ekipin turk, i cili është i gatshëm ta lirojë Zaniolon për një ofertë mbi 20 milionë euro.
23-vjeçari në janar të këtij viti iu bashkua Galatasarayt nga Roma dhe me kampionin e Turqisë ka kontratë deri në vitin 2027.
“Të luaj për Juventusin do të ishte realizim i ëndrrës për shkak se gjithmonë kam bërë tifo për këtë ekip. Bëhet fjalë për një ekip të madh dhe nëse ekziston mundësia t’i bashkohem, do të isha i lumtur”, ka thënë Zaniolo.
Në 10 ndeshje të luajtura në kampionatin turk, Zaniolo ka shënuar 5 gola.