Gjatë javës ishte i sëmurë dhe për këtë arsye nuk startoi të shtunën mbrëma ndaj Pisas. Por kur hyri në fushë, në minutën e 61-të, Edon Zhegrova e ndryshoi për të mirë lojën e Juventusit. Të dyja golat e Juves u shënuan me Zhegrovën në fushë, ndërsa skuadra torineze fitoi 2:0 në udhëtim ndaj Pisas. Ndeshja i takoi xhiros së 17-të të Serie A.
Zhegrova ende nuk po luan nga fillimi te gjiganti italian, por fjalët e mira të Luciano Spallettit për të japin shpresë për të ardhmen.
“Në pjesën e dytë kishim më shumë kualitet dhe kreativitet. Zhegrova u paraqit mirë kur hyri, njëjtë si David. Ata na dhënë më tepër kualitet në lojën sulmuese. Ne ia dolëm të shënonim dhe në atë moment kemi merituar edhe më shumë, duke parë se si i kemi krijuar hapësirat brenda zonës”, ka thënë Spalletti.
Ai më pas ka treguar se Zhegrova gjatë javës ishte me grip.
“Zhegrova ishte me grip, gjatë tri ditëve kishte temperaturë të lartë dhe ushtroi pak vetëm të premten në mëngjes. Kam pasur dyshime nëse do të mund të qëndroj për ata 35 minuta. Por, më pas është dashur të bënim zëvendësime dhe ai e ka këtë shkëndijë në zgjedhjet që bën dhe në mposhtjen e lojtarit që e ruan. Mendova se mund të bënte më pak duke pasur parasysh gripin, por në vend të kësaj luajti mirë dhe na dha cilësi”, ka shtuar tekniku italian.
Spalletti pranon cilësitë e Zhegrovës në lojën një kundër një. Madje ka bërë një vlerësim interesant për kosovarin.
“Ai mund të paraqitet mirë, pak veta e kanë cilësinë e tij në lojën një kundër një, madje edhe për mënyrën se si e godet topin dhe si i shërben të tjerët brenda në zonë. Ai mban syze trediomensionale kur luan”, ka thënë Spalletti.
Pas ndeshjes foli edhe Zhegrova.
“Gjëja e rëndësishme është që grupi është i bashkuar dhe më pas qartë se mund të vë në pah aftësitë e mia. Spalletti po më ndihmon të përmirësoj lojën në mbrojtje, gjë që më kanë kërkuar edhe në klubet e tjera dhe që unë e di se është e rëndësishme në futbollin modern. Nuk mund të jem gjithnjë 100 për qind i gatshëm. Nuk kam luajtur shumë për kohë të gjatë për shkak të lëndimit. Por, tani po kontribuoj”, ka thënë Zhegrova.
Edhe analistë të futbollit në Itali kanë vlerësuar ndikimin e madh të Zhegrovës në lojën e Juventusit, që është në seri prej katër fitoreve.