Legjenda franceze e futbollit, Zinedine Zidane, ka ndezur sërish botën e futbollit me një deklaratë të shkurtër, por shumë domethënëse. Ish-trajneri i Real Madridit ka konfirmuar se është gati për rikthim në stolin e trajnerit pas disa vitesh pushim.
“Do të drejtoj një ekip shumë shpejt,” – tha Zidane për mediat ndërkombëtare, duke lënë të kuptohet se marrëveshja e tij e re është pranë përfundimit.
Zidane nuk ka drejtuar asnjë skuadër që nga viti 2021, kur u largua nga Real Madridi, me të cilin fitoi tre trofe radhazi të Ligës së Kampionëve, duke hyrë në histori si një nga trajnerët më të suksesshëm të shekullit të fundit.
Pas kësaj deklarate, mediat europiane kanë nisur menjëherë spekulimet mbi destinacionin e tij të ardhshëm. Sipas burimeve franceze, Zidane mbetet kandidati kryesor për të marrë drejtimin e Kombëtares së Francës pas përfundimit të mandatit të Didier Deschamps.
Në një tjetër intervistë për NDTV Sports, “Zizou” shtoi:
“Do të kthehem sërish në stolin e trajnerit… një ditë dua të drejtoj Kombëtaren e Francës.”
Për momentin, mbetet e paqartë se cili do të jetë ekipi i tij i ri, por një gjë është e sigurt — rikthimi i Zinedine Zidane është shumë afër.