Jesper Ostlund është emëruar selektor i ri i Kombëtares së Kosovës në hendboll (meshkujt). Suedezi Ostlund u prezantua të martën në Prishtinë, në një konferencë për media ku mori pjesë edhe presidenti i FHK-së, Edin Kolgeci.
Ostlund ka një karrierë të suksesshme në Suedi, duke drejtuar skuadra elitare si Hallby dhe Savehof, ku fitoi tituj kampion dhe kupa kombëtare. Me Hallbyn arriti plejofin e kampionatit suedez për herë të parë në histori dhe u shpall trajner i vitit 2020. Ai ka drejtuar gjithashtu Kombëtaret e grupmoshave të reja të Suedisë.
Si ndihmës i tij do të jetë Jasmin Zhuta, me karrierë të spikatur në Suedi dhe prejardhje shqiptare nga Maqedonia e Veriut. Zhuta do të përqendrohet në punën individuale me lojtarët.
Ostlund ka bërë të ditur se synimi kryesor është kualifikimi i Kosovës në një ngjarje të madhe, si Kampionati Evropian apo Botërori.