Përkundër reshjeve të vazhdueshme të shiut dhe fushës së rënduar, ndeshja kualifikuese për Euro 2024, Kosovë – Rumani, do të zhvillohet.
Në fakt, Futbolli.info merr vesh se pas arritjes se gjyqtarëve holandezë, të cilët do ta ndajnë drejtësinë në këtë duel, Danny Makkelie si gjyqtar kryesor, së bashku me delegatin e ndeshjes nga Belgjika, e kanë inspektuar fushën në stadiumin “Fadil Vokrri” dhe janë dakorduar që ajo në pjesën më të madhe i plotëson kushtet për zhvillimin e ndeshjes.
Gjyqtari holandez ka përgëzuar punën e stafit të stadiumit të cilët vazhdimisht po punojnë në tërheqjen e ujit nga fusha. Ai ka kërkuar që deri në fillimin e ndeshjes të bëhet tërheqja e ujit në mënyrë që të ketë kushte sa më të mira për lojë. Aktualisht reshjet e shiut po vazhdojnë, teksa stafi i stadiumit dhe i FFK-së po bëjnë të pamundurën për të krijuar kushtet e nevojshme për zhvillimin e kësaj ndeshje pa vështirësi të mëdha.
Prandaj, sot më shumë se kurrë futbollistëve dardanë u duhet mbështetja e fuqishme nga tribunat për arkëtimin e tri pikëve të reja.