Miralem Pjanic është tërhequr nga Kombëtarja e Bosnje-Hercegovinës, pas 115 ndeshjesh me përfaqësuesen. Njoftimi ka ardhur nga vetë 34-vjeçari Pjanic, me një postim në rrjetet sociale.
“Pas 16 vitesh për Bosnjën dhe Hercegovinën time, ka ardhur momenti të them se ka mbaruar. Ky është sigurisht një nga vendimet më të vështira që më është dashur të marr, por me krenari të madhe dhe kënaqësi të vërtetë them – mjafton”.
“Kam luajtur 115 ndeshje, kam përjetuar kaq shumë gëzim, duke shkuar në Kupën e Botës – ishte e gjitha një ëndërr që kisha si fëmijë dhe që u bë realitet gjithmonë me dashuri dhe me krenari për fanellën e vendit tim, duke luajtur për popullin tim, për fansat tanë besnikë në mbarë botë”.
“Faleminderit të gjithë përzgjedhësve, stafit mjekësor dhe ekonomëve që na mbështetën në këtë rrugëtim. Faleminderit BH Fanaticos që besoi në mua dhe më ndihmoi të realizoj ëndrrën time dhe të luaj për vendin që dua. Mirënjohja më e madhe shkon për prindërit e mi dhe e gjithë familjen, ju ishit forca dhe mbështetja ime në çdo gjë”.
“Në çdo klub ku kam luajtur, kam qenë një boshnjak krenar, duke u përpjekur gjithmonë të jem një model për fëmijët tanë, duke shpresuar që edhe ata një ditë të hyjnë në klubet më të mëdha të botës. I uroj Kombëtares gjithë të mirat në të ardhmen. Sergej, mjeshtër, të uroj gjithë të mirat, ti ishe modeli im. Na çuat në lartësi të mëdha, shpresoj të na drejtoni sërish në rrugën e suksesit. Të dua Bosnja ime”, ka shkruar Pjanic.