Cristiano Ronaldo edhe zyrtarisht është prezantuar te skuadra e Al-Nassrit në Arabinë Saudite.
Lajmi është bërë i ditur sonte nga klubi nga Arabia Saudite, përmes një njoftimi në rrjetin social “Twitter”.
Cristiano Ronaldo, pesë herë lojtari më i mirë në botë, është prezantuar te skuadra e Arabisë Saudite, Al-Nassr, të premten mbrëma.
Ylli portugez ka nënshkruar kontratë dyvjeçare me klubin nga Arabia Saudite.
37-vjeçari, sipas mediave, pritet të përfitojë mbi 200 milionë euro në vit, duke përfshirë edhe ato që do të vijnë nga komercializimi.
Ronaldo konsiderohet gjerësisht si një nga lojtarët më të mëdhenj të futbollit. Ka fituar pothuajse çdo trofe të mundshëm, përveç Kupës së Botës.
E ka nisur karrierën te Sportingu, luajti te Manchester Unitedi, Real Madridi e Juventusi. Para pak javësh, pas rikthimit, u largua sërish nga Unitedi.
Lëvizja e tij për t’u transferuar në Arabinë Saudite është vlerësuar si befasi, pasi vetë Ronaldo kishte deklaruar se dëshiron ta mbyllë karrierën në një klub evropian.
