Amir Rrahmani, Edon Zhegrova dhe Leart Paqarada janë në mesin e disa lojtarëve që nuk kanë marrë ftesë nga Kosova për tri ndeshjet e nëntorit në kuadër të ciklit kualifikues të Kampionatit Evropian.
Mungesa e tyre përkon më së shumti me përballjen që Dardanët e zhvillojnë të dielën ndaj Izraelit.
Kjo pasi klubet janë të angazhuara në ligat e tyre përkatëse gjatë këtij vikendi.
Përjashtim ka bërë Mallorca e Vedat Muriqit në Spanjë, që ka shtyrë takimin e këtij vikendi në La Liga.
Megjithatë, të njëjtën gjë nuk kanë mundur që ta bëjnë klubet në ligat e tjera. Mungesë tjetër do të jetë edhe Betim Fazliji dhe Shkëlqim Vladi.
Ndërkohë, Albion Rrahmani do të jetë mungesë për ndeshjet e këtij muaji për shkak të lëndimit që pësoi pikërisht në grumbullim me Dardanët.
Përndryshe grupin I, e kryeson Rumania me 16 pikë të grumbulluara nga tetë ndeshje, Zvicra është e dyta me një pikë më pak, por me një ndeshje më pak të zhvilluar.
Në vendin e tretë është Izraeli me 11 pikë, me dy takime më pak të luajtura. Në pozitën e katërt është Kosova me shtatë sosh.
Në vendin e pesë dhe të gjashtë është Bjellorusia dhe respektivisht Andorra me vetëm dy pikë.