Trajneri 46-vjeçar spanjoll, Robert Moreno thuhet se ka edhe dy oferta nga klubet, përveç ofertës nga Përfaqësuesja e Kosovës.
Sipas gazetës spanjolle AS, Moreno është afër rikthimit në stol pasi ish-trajneri i Spanjës ka mbajtur takime këtë javë me tre destinacione të mundshme: dy klube dhe një kombëtare.
Ky medium shton se të interesuar për nënshkrimin e trajnerit spanjoll janë Federata e Kosovës që ai të mund të drejtojë Përfaqësuesen e Kosovës, klubi rus Sochi dhe klubi turk Adana Demirspor.
Moreno ka qenë këto ditë në Rusi dhe Turqi për të zhvilluar intervista të ndryshme me bashkëbiseduesit e interesuar për nënshkrimin e tij.
Ofertat raportohet se janë të rëndësishme financiarisht, por ish-trajneri i Granadës dhe Monacos do ta vlerësojë më shumë projektin sportiv kur zgjedh.
Në këtë kuptim, gazeta AS shton se opsioni i drejtimit të një klubi po fiton më shumë fuqi për momentin sesa drejtimi i një ekipi kombëtar, që në këtë rast është Kosova.
Përvoja e fundit e Morenos ishte Granada vitin e kaluar. Më 7 mars 2022, ai u shkarkua nga drejtuesit e klubit pasi humbi ndaj Valencias 3-1. Që atëherë, ai ka pasur disa propozime. Në ditët në vijim ai do të marrë një vendim.