Chelsea ka hedhur një hap të gabuar teksa është mundur nga Midelsborugh në ndeshjen e parë të gjysmëfinales së Kupës së Ligës.
Sfida në transfertë është mbyllur me fitoren 1-0 të vendasve, që nuk shënonin ndaj bluve apo nuk i mundnin që nga viti 2006.
Pas 9 humbjesh radhazi dhe një golavarazhi të përgjithshëm 0-21, Midelsborugh ia doli të fitonte, falë golit të Heknei në pjesën e parë të sfidës. Chelsea krijoi disa raste por nuk diti të finalizonte, sidomos në pjesën e parë të duelit.
Në të dytën, duke parë problemet e ekipit të tij në repartin e avancuar, Pochettino vendosi të aktivizonte edhe Brojën, të cilin e kishte mbajtur në stol. Por ishte e vështirë që sulmuesi shqiptar të gjente hapësira për të treguar sa vlente, me ekipin vendas që u mblodh në mbrojtje dhe në fund siguroi këtë fitore minimale në ndeshjen e parë.