Donjeta Sadiku ka arritur edhe një sukses të madh në boksin amator. Donjeta të premten u paraqit në gjysmëfinale të Kampionatit Evropian që po mbahet në Budvë të Malit të Zi.
Në një meç të fortë dhe thuajse të barabartë, Donjeta u mposht nga irlandezja, Kellie Harrington. Të gjithë gjyqtarët ia dhanë fitoren Harringtonit, që në finale kaloi me rezultatin 5:0. Si humbëse e gjysmëfinales, Donjeta merr medaljen e bronztë.
Në fakt dy boksieret në ring kanë shkëmbyer goditje vazhdimisht dhe paraqitja e Donjetës nuk dukej për humbje me 5:0. Meçi i ka takuar kategorisë deri 60 kilogramë.
Dy gjyqtarë kanë vlerësuar 2:1 në të mirë të irlandezes raundet. Ndërkohë tre të tjerë të tri raundet e kanë vlerësuar më të mirë Harringtonin, kampionen olimpike dhe botërore në boksin amator.
Donjeta më herët këtë vit ka fituar edhe medalje të bronztë botërore. Në kategori të reja po ashtu ka fituar medalje botërore e evropiane, ndërsa suksese më të mëdha prej saj priten në të ardhmen.
Në Budvë, Donjeta i kishte dy fitore. Fillimisht e mposhti Marinela Canin, boksieren shqiptare që përfaqëson Greqinë. Në duelin e dytë fitoi ndaj rumunes Andreea Loredana Marin.