Roger Federer e mbylli karrierën në tenis me një disfatë teksa në partneritet me Rafael Nadal, rivalin dhe njëkohësisht mikun e tij më të mirë, u mposhtën në Laver Cup nga dyshja amerikane Jack Sock dhe Frances Tiafoe.
Këta të fundit, edhe pse bëhej fjalë për një sfidë ku vëmendja ishte te Federer teksa bëhej fjalë për të shijuar goditjet e fundit të zvicerianit, nuk toleruan aspak dhe u shfaqën agresivë në fushë. Tiafoe, madje në disa raste goditi në trup si Nadal ashtu edhe Federer, megjithatë amerikani i cili u kontestua edhe nga tifozët e pranishëm, së fundmi shprehet se nuk ka ndërmend t’i kërkojë falje Federer.
“Unë dua ta shoh Federer gjithnjë duke fituar, megjithatë nuk kam ndërmend t’i kërkoj falje për ndeshjen tonë. Nëse do të kërkonim falje për kundërshtarët që mposhtim në fushë, atëherë Federer do të kishte shumë falje për të kërkuar pasi në 24-vite karrierë i ka mposhtur të gjithë.
Unë e falenderoj për atë që i ka dhuruar tenisit, jam i lumtur që e njoh dhe që mund ta konsideroj mik dhe koleg. I uroj më të mirat në jetë për atë që e pret pas tenisit, por e përsëris, nuk kam ndërmend të kërkoj falje”, tha Tiafoe.