Real Madridi ka humbur në shtëpi në ndeshjen kryesore të xhiros së gjashtë të Ligës së Kampionëve.
Të mërkurën mbrëma në “Santiago Bernabeu”, Madridi pësoi 2:1 nga Manchester City.
Ndeshja u vendos që në pjesën e parë.
Rodrygo kaloi në epërsi madrilenët në minutën e 28-të.
Për 1:1 shënoi Nico O’Reilly në minutën e 35-të. Erling Haaland e shënoi golin e fitores për skuadrën e Pep Guardiolas. Ai shënoi nga pika e bardhë në minutën e 43-të. Penalltia u tha pas ndërhyrjes së VAR-it, pikërisht për faul në norvegjezin Haaland.
Në pjesën e dytë Madridi rriti presionin, por pa thyer Manchester Cityn. Ndërkohë lojtarët e ekipit anglez kishin disa raste të mira për shënim. Por shifrat e pjesës së parë nuk ndryshuan.
Humbja nga City mund të shënojë fundin e epokës së Xabi Alonsos te Real Madridi. Mediat spanjolle kanë raportuar të hënën e të martën se Alonso mund të shkarkohet në rast të humbjes nga Manchester City.
Javët e fundit ishin shumë të vështira për Real Madridin. Dhe ndryshimi mund të kërkohet me largimin e Alonsos.
Real Madridi është i shtati me 12 pikë. City doli në vendin e katërt me 13 pikë.