Sulmuesi i Llapit, Muhamet Hyseni është shpallur futbollisti më i mirë i xhiros së 13-të në Superligën e Kosovës në futboll. Hysenit e ka fituar çmimin “Ylli i Javës”, të cilin e ndanë Federata e Futbollit të Kosovës.
Ai është vlerësuar si lojtari më i mirë i xhiros së fundit nga komisioni i veteranëve të futbollit pas paraqitjes së mirë që e pati në derbin ndaj Prishtinës. Hyseni shënoi dy gola, ndërsa Llapi barazoi 2:2 në stadiumin “Fadil Vokrri” në Prishtinë.
“Është një ndjenjë shumë e mirë dhe privilegj për mua, pasi është hera e dytë që shpallem më i miri i javës. E falënderoj ekipin e Llapit, bashkëlojtarët dhe gjithë stafin për mbështetjen dhe që më motivojnë të vazhdoj të rritem edhe më shumë”, ka thënë Hyseni për faqen zyrtare të FFK-së, duke premtuar se Llapi së shpejti do të rikthehet tek fitorja. 22-vjeçari ka shënuar 9 gola për Llapin në 13 paraqitje këtë edicion në elitën e futbollit kosovar.