Skuadra e Ballkanit ka shënuar fitore në kuadër të xhiros së 12 të Superligës së Kosovës në futboll. Ballkani, të enjten në shtëpi e mposhti skuadrën e Trepçës ’89, me rezultatin 2:0. Të dy golat, skuadra nga Suhareka i shënoi në pjesën e dytë, pasi pjesa e parë u mbyll pa gola. Fillimisht, Ermal Krasniqi (48’) shënoi golin e epërsisë, ndërsa rezultatin përfundimtar e vulosi Albion Rrahmani (75’).
Rrahmani shënoi nga penalltia, të cilën e shkaktoi mbrojtësi Madi Fatty që debutoi në këtë takim te 89-shi. Me këtë fitore, Ballkani forcohet në pozitën e dytë në tabelë me 25 pikë të mbledhura, dy më pak se Drita që është lidere dhe ka dy ndeshje më shumë të luajtura.