Sulmuesi i Dinamos së Tiranës, Baton Zabërgja, është ftuar nga Kombëtarja e Kosovës në futboll për ndeshjet e këtij muaji në Ligën e Kombeve. Lajmin e ka bërë të ditur të premten në mbrëmje skuadra e Dinamos së Tiranës.
“Përfaqësuesja e Kosovës do të zhvillojë dy ndeshjet e radhës në Ligën e Kombeve në datat 15 dhe 18 Nëntor, përkatësisht kundër Rumanisë dhe Lituanisë. Sulmuesi ynë do të jetë pjesë e listës së përzgjedhur nga trajneri Franco Foda për këto dy ndeshje”, ka shkruar Dinamo e Tiranës në rrjetet sociale.
Për Zabërgjën kjo është hera e parë që ftohet te Kosova. Më herët ka luajtur edhe për Përfaqësuesen U21 të Kosovës.
Zabërgja është pjesë e Dinamos së Tiranës nga viti 2023. Ai u transferua si futbollist i lirë nga Gjilani.
Këtë edicion në Superioren e Shqipërisë në 12 ndeshje të luajtura ka shënuar pesë gola dhe ka bërë dy asistime.