Artim Pollozhani beson se Ballkani ka forcë dhe potencial për ta mbrojtur titullin e kampionit. Pollozhani është ndihmëstrajner te kampioni i Kosovës. Ai udhëhoqi ekipin e Ballkanit në mungesë të trajnerit Ilir Daja, që ndeshjen ndaj Drenicës u përjashtua me karton të kuq.
Pollozhani udhëhoqi Ballkanin drejt fitores ndaj Trepçës ’89 me shifrat 2:0 të enjten, në kuadër të javës së 12-të të Superligës së Kosovës në futboll. Ndeshja u zhvillua në Suharekë.
“Një fitore e pastër nga ana jonë. Trepça ‘89 ka lojtar të mirë dhe na vunë në vështirësi. Ishte e vështirë për faktin që luajmë gati çdo tre ditë dhe lojtarët humbin energji. Por të gjithë djemtë bënë detyrën e tyre dhe i përgëzoj për paraqitjen. Djemtë janë rritur shumë nga paraqitja në Evropë. Mendoj që i ka bërë edhe më të fortë, por pjesën e eksperiencës kanë fituar shumë. Ballkani ka forcë, potencial për të mbrojtur titullin e kampionit. Nuk e shoh vetëm Dritën si konkurrente për titull, por janë edhe skuadrat tjera si Prishtina, Llapi që kanë kualitet në ekipet e tyre”, ka thënë Pollozhani.