Selektori i Zvicrës, Murat Yakin i ka zbuluar momentet kur ia kumtoi Ardon Jasharit se do ta ftojë për Botërorin e Katarit.
20 vjeçari u përfshi në listën prej 26 futbollistëve “Helvetikë”, ndërsa është shqiptari i tretë që ftohet, krahas Xherdan Shaqirit e Granit Xhakës.
Trajneri zviceran thotë se futbollisti shqiptar nga Kumanova e meritoi ftesën pas paraqitjeve të këtij sezoni, ndërsa e sheh atë si të ardhme të kësaj Kombëtareje.
“Jashari e fitoi vendin në Kombëtare falë paraqitjeve të tij. Në fillim ishte i qetë, por më pas pati brohoritje”, ka treguar Yakin në konferencë për shtyp sot.
Jashari kishte kontakte me zyrtarët e Federatës së Futbollit të Kosovës, por futbollisti nga Maqedonia e Veriut në fund vendosi për Zvicrën. /Gazeta Express/