Vedat Muriqi do ta udhëheqë Kosovën në ndeshjen vendimtare ndaj Rumanisë. Kosovës i duhet fitorja me disa gola dallim, ndërsa atë do ta kërkojë me Muriqin në sulm.
Sulmuesi kryesor i mungoi Kosovës në dy ndeshjet e tetorit për shkak të një lëndimi. Ka nisur të luaj te Mallorca dhe pritet të startojë ndaj Rumanisë për Kosovën, të premten në Bukuresht.
Selektori i Kosovës, Franco Foda, të shtunën shpalli listën e lojtarëve për ndeshjet me Rumaninë dhe Lituaninë. Ndeshja Kosovë – Lituani është më 18 nëntor.
Por i gjithë fokusi është te ndeshja me Rumaninë, që do të vendosë për vendin e parë në Grupin 2 të Ligës C të Ligës së Kombeve të UEFA-s.
Rumania udhëheq në grup me 12 pikë, tri më shumë se Kosova. Rumania kishte fituar 3:0 ndaj Kosovës më 6 shtator në Prishtinë. Kosovës i duhet fitore më e thellë në Bukuresht për ta kaluar Rumaninë në renditje.
Ashtu si pritej, Foda ka bërë pak ndryshime në listë. Dy ndeshjet e nëntorit janë të fundit të edicionit të katërt të Ligës së Kombeve dhe trajneri gjerman bazohet në lojtarët e konfirmuar.
Në përfaqësuese është kthyer Bersant Celina. 28-vjeçari është pjesë e AIK-ut në Suedi. Celina, që luan në repartin ofanziv, ka 35 ndeshje e një gol për Kosovën. Së fundi ishte ftuar dhe kishte luajtur në mars.
Emër i ri te Kosova është Baton Zabërgja. Sulmuesi 23-vjeçar është pjesë e skuadrës tiranase, Dinamo City. Më herët ka luajtur për U21 të Kosovës.
Arijanet Muriq, Amir Shaipi e Visak Bekaj konkurrojnë për portë. Mbrojtja ka përbërje të njëjtë. Udhëhiqet nga kapiteni Amir Rrahmani, ndërsa Mërgim Vojvoda, Florent Hadërgjonaj, Leart Paqarada, Donat Rrudhani, Fidan Aliti, Lumbardh Dellova, Ilir Krasniqi e Andi Hoti janë mbrojtësit e tjerë.
Elvis Rexhbeçaj, Valon Berisha, Muharrem Jashari e Lindon Emërllahu konkurrojnë për mesfushë, ndërsa në sulm pos Muriqit pritet të startojnë edhe Edon Zhegrova e Milot Rashica. Rastin e kërkojnë edhe Florent Muslija, Albion Rrahmani e Fisnik Asllani.
Jashtë ka mbetur Ermal Krasniqi, që është i lënduar dhe Emir Sahiti, që po ashtu ka lëndim. Nuk u ftua këtë herë i riu Eliot Bujupi.
Në listën rezervë të Fodas janë Ilir Avdyli, Mustafë Abdullahu, Lirim Kastrati, Mirlind Kryeziu, Leard Sadriu, Art Smakaj, Altin Zeqiri, Drilon Hazrollaj, Astrit Selmani e Muhamed Hyseni.
Kombëtarja e Kosovës grumbullohet të hënën.